глас 4
Мир оставил еси, Петре, Господа ради своего и крест восприим на рамо свое, на гору достигли еси Афонскую, якоже древле фесвитянин Илия. И в ней пребыв пощением, и молитвами, и бдением, Бога милостива творя, и Пречистую Богородицу Молебницу предлагая, сего ради вопием ти: моли Христа Бога, да спасет души наша.

Слава

глас 2
Удалив себе человеческаго сожи­тельства, в пещерах каменных и разселинах пожил еси, желанием Божественным и любовию, Петре, Господа твоего, от Него же венец приял еси: моли непрестанно спастися нам.

И ныне

глас 6
Предстательство христиан непостыдное, ходатайство ко Творцу непреложное, не презри грешных молений гласы, но предвари, яко Благая, на помощь нас, верно зовущих Ти, ускори на молитву, и потщися на умоление, предстательствующи присно, Богородице, чтущих Тя.