глас 1
Желанием духовным распалився и мятежи мирския отринув, к Богу любовию прилежно присовокупися. И Того вседушне взыскуя, во внутреннюю пус­тыню отшел еси, при водах вселися, идеже во слезах и трудех пребывая многолетное время, в терпениих мнозех жи­тие ангельское проходил еси в наставлении Божественнаго разума и множе­ство монахов собрал еси, мудре, ихже посещая не остави, Варнаво преподобне, отче наш, Пресвятей Троице моляся от зол всяческих избавити и спасти души наша.

Слава

глас 8
От юности, преподобне, плоть твою в постех и молитвах источил еси и, крест твой взем, усердно последовал еси Христу, темже и к Вышним течение радостно совершил еси, идеже со всеми святыми предстоиши. И ныне стадо твое посещай, поминая чтущих всесвятую память твою, да вси благодарственно вопим ти: радуйся, Богомудре Варнаво, наставниче пустынный.

И ныне

глас 6
Предстательство христиан непостыдное, ходатайство ко Творцу непреложное, не презри грешных молений гласы, но предвари, яко Благая, на помощь нас, верно зовущих Ти, ускори на молитву, и потщися на умоление, предстательствующи присно, Богородице, чтущих Тя.