глас 8
Святии вси в земли Рязанстей и Муромстей просиявшии, приснии наши молитвенницы и заступницы, молите Владыку Христа Бога нашего мир вселенней даровати и душам нашим велию милость.

Слава

глас 8
Яко многосветлыя звезды, от града Рязани возсиявшии, угодницы Христовы, Православия охранители и благочестия учители, присные наши заступницы молим вас, за ны Христу Богу и Пречистей Его Матери молитеся, да благодарною душею зовем: радуйтеся, святии вси, в земли Рязанстей просиявшии.

И ныне

глас 6
Предстательство христиан непостыдное, ходатайство ко Творцу непреложное, не презри грешных молений гласы, но предвари, яко Благая, на помощь нас, верно зовущих Ти, ускори на молитву, и потщися на умоление, предстательствующи присно, Богородице, чтущих Тя.