глас 8
Прежде отвержением мира, яко морскаго треволнения, избегосте, отцы преподобнии: послежде же изволением Божиим в водах морских кончину блаженную приясте и к неболезненному покою представистеся от земли радующеся. Тем и по кончине от Христа Бога прославистеся чудесы обильно, теплии в бедах верным помощницы показастеся. И ныне на небесах предстояще престолу Христову, Вассиане преблаженне и Ионо преславне, молитеся присно о душах наших.

Слава

глас 2
Яко сокровище богатно, верным Божественная благодать из морских недр издаде мощи ваша, отцы преблаженнии, и в месте пусте целы и невредимы обретошася преславно, и тако вас ради ныне славится Бог, Емуже со дерзновением предстояще ныне на Небесех, Вассиане и Ионо досточуднии, молитеся непрестанно о всех нас.

И ныне

глас 6
Предстательство христиан непостыдное, ходатайство ко Творцу непреложное, не презри грешных молений гласы, но предвари, яко Благая, на помощь нас, верно зовущих Ти, ускори на молитву, и потщися на умоление, предстательствующи присно, Богородице, чтущих Тя.