глас 8
Божественным желанием весь сам себе от юного возраста Господеви возложив, явился еси светильник светлый граду твоему, поучая всех истинней вере и житию Богоугодному, священномучениче Макарие, Овручская похвало. Сего ради, яко агнец непорочный гонимый от распрелюбивых врагов, возшел еси во обитель Каневскую, идеже, яко пастырь добрый, душу твою положил еси за овцы твоя. И ныне ко всечестней раце многоцелебных мощей твоих мы грешнии со умилением притекающе, дар исцеления приемлем, многострадальне. Ты бо присно источаеши болящим здравие, печальным утешение, и всем чтущим тя всякое исполняеши требование, моляся Христу Богу спастися душам нашим.

Слава

глас 2
Постническое и равноангельское житие твое, страдальческими уяснил еси подвиги, и ангелом совсельник, явился еси, Богоблаженне Макарие: с ними Христу Богу моляся не престай о всех нас.

И ныне

глас 6
Предстательство христиан непостыдное, ходатайство ко Творцу непреложное, не презри грешных молений гласы, но предвари, яко Благая, на помощь нас, верно зовущих Ти, ускори на молитву, и потщися на умоление, предстательствующи присно, Богородице, чтущих Тя.