глас 1
Спаси, Господи, люди Твоя и благослови достояние Твое, победы на сопротивныя даруя, и Твое сохраняя Крестом Твоим жительство.

глас 8
Днесь возсия нам память твоя, славне Паисие, яко солнце светозарное, лу­чами озаряющи весь мир, тако и ты, преподобне, чудесы своими тьму нощи злых духов от нас отгоняя; днесь Небесныя силы, и святых Ангел, и души пра­ведных мысленно торжествуют, радующеся; днесь и мы, грешнии, припадающе честному твоему образу молимся: о, преподобне Паисие, Христа Бога моли непрестанно спасти град и люди, иже тебе почитающия.

Слава

глас 3
Возсия, Господи, граду Твоему Галичу, яко светозарное солнце, угодник Твой Паисий, радостно вселенную озаряя своими чудесы, и приходящих с верою ко гробу его святому. Тако молитвами Пречистыя Богородицы от бед всех нас избави, и упраздни варварская шатания, яко мы, людие Твои, Господи, и град наш и страна вельми Тобою хвалится, и спасается молитвами преподобнаго Паисия.

И ныне

глас 8
Со святыми упокой, Христе, души раб Твоих, идеже несть болезнь, ни печаль, ни воздыхание, но жизнь безконечная.