глас 8
Днесь светло красуется славнейший великий Новград, имея мощи твоя в себе, святителю Иоанне, яко солнечныя лучи испущающия, и подающия исцеления притекающим с верою к раце мощей твоих; молися Христу Богу, избавити град сей невредим от варварскаго пленения и междоусобныя брани, и огненнаго запаления, святителю Богомудре и чудоносче, небесный человече и земный ангеле, да сошедшеся любовию в память твою, светло празднуем в песнех и пениих радующеся, и Христа славяще, тебе таковую благодать даровавшего исцелений, и Великому Новуграду заступление и утверждение.

Слава

глас 4
Возвеселися явленно, честная Церковь Христова, в память днесь приснословущего святителя Иоанна, от Великаго Новаграда возсиявшаго, и всю страну удивившаго преславными чудодеянии, и всеми добродетельми украсившагося. И по преставлении бо честное тело его обретеся нетленно, источающее велия чудеса; темже зовем ему: о всеблаженне, моли Христа Бога непрестанно о всех нас.

И ныне

глас 6
Предстательство христиан непостыдное, ходатайство ко Творцу непреложное, не презри грешных молений гласы, но предвари, яко Благая, на помощь нас, верно зовущих Ти, ускори на молитву, и потщися на умоление, предстательствующи присно, Богородице, чтущих Тя.