глас 2
Яко сокровище пребогатое, многолетно в земли сокровенное, честныя мощи твоя обретошася чудоточащия, всеблаженне отче, святителю Алексие, от нихже врачевство приемлюще обогащаемся, и Христа славословим, глаголюще: слава Прославляющему святыя Своя.

Слава

глас 8
Яко солнце незаходимое от гроба возсия нам, от мног лет сокровены честныя твоя мощи нетленны, святителю Алексие, тобою благодать приемлем: всю бо страну сию, и вся ны чудесы и добротою обогащаеши, действом благодати, да поем ти: радуйся, отче, светило России.

И ныне

глас 6
Предстательство христиан непостыдное, ходатайство ко Творцу непреложное, не презри грешных молений гласы, но предвари, яко Благая, на помощь нас, верно зовущих Ти, ускори на молитву, и потщися на умоление, предстательствующи присно, Богородице, чтущих Тя.