глас 4
От корене Иессеева и от чресл Давидовых Богоотроковица Мариам раждается днесь нам, радостию бо радуются всяческая и обновляются. Срадуйтеся купно небо и земля, восхвалите Ю отечествия языков. Иоаким веселится, и Анна торжествует, зовущи: неплоды рождает Богородицу и Питательницу жизни нашея.

Слава

глас 3
Дева днесь и Богородица Мария, Чертог безконечный Небесного Жениха, раждается от неплодове, Божиим Светом, Колесница Слова благоукрашается. На сие бо преднаречеся Божественная Дверь, и Мати сущия Жизни.

И ныне

глас 6
Предстательство христиан непостыдное, ходатайство ко Творцу непреложное, не презри грешных молений гласы, но предвари, яко Благая, на помощь нас, верно зовущих Ти, ускори на молитву, и потщися на умоление, предстательствующи присно, Богородице, чтущих Тя.