глас 8
Светильники светлыя явльшеся, доброту земную мудренно оставльше, и идоша во внутреннюю пустыню, Амфилохие, Макарие, Тарасие и Феодосие, смирение и всякую добродетель извыкше, и обретоша безсмертие, постом и бдением и прочим воздержанием себе приносяще Христу, и ныне на Небесех Престолу Христову предстоите. Моли­те, отцы Богомудрии, Амфилохие, Мака­рие, Тарасие и Феодосие, умирити мир и спастися душам поющих вас и со­грешений оставление даровати чтущим всечестную память вашу.

Слава

глас 2
Яко незаходимая светила мысленнаго Солнца, просветисте вселенную и, верных души и телеса лучами чудес ваших озаряюще, независтно подаваете от недуг исцеление. Темже, сошедшеся, верою вас в песнех восхваляем, яко наши премудрыя наставники и к Богу ходатаи, и непрестанно вопием: радуйтеся, отцы Богомудрии, Амфилохие, Макарие, Тарасие и Феодосие.

И ныне

глас 6
Предстательство христиан непостыдное, ходатайство ко Творцу непреложное, не презри грешных молений гласы, но предвари, яко Благая, на помощь нас, верно зовущих Ти, ускори на молитву, и потщися на умоление, предстательствующи присно, Богородице, чтущих Тя.