глас 2
Познан быв, от пелен освящен, и явлься благодатей исполнен, чудесы мир озарил еси, и демонов множество отгнал еси, священнодетелю Феодоре; темже о нас молися Господеви.

Слава

глас 3
Яко на огненную колесницу добродетельми, Богоносе, возшед, востекл еси на небесная жилища, яко ангел с человеки пожил еси, и яко человек со ангелы окрест ликовствуеши. Сего ради показался еси чудес Божественное приятелище, Феодоре преподобне.

И ныне

глас 6
Предстательство христиан непостыдное, ходатайство ко Творцу непреложное, не презри грешных молений гласы, но предвари, яко Благая, на помощь нас, верно зовущих Ти, ускори на молитву, и потщися на умоление, предстательствующи присно, Богородице, чтущих Тя.