глас 6
Псково-Печерская обитель, издрев­ле славная чудесы иконы Богоматерни, многия иноки Богови воспита, тамо и преподобный Корнилий подвигом добрым подвизася, чудную Богоматерь славя, иноверныя просвещая, иноки и многия люди спасая, обитель же свою див­но украшая и ограждая. Тамо и мучени­чества венец, по многих летах пастыр­ства своего, доблестне прият. Темже воспоим, людие, Христа Бога, и Пречистую Его Матерь возблагодарим, яко дарова нам преподобномученика славна и мо­литвенника о душах наших достоблаженна.

Слава

глас 4
Светлый светильник Православия и сугубая Псковския земли защита был еси, многобожие искореняя и люди к Богу наставляя. Дом Богоматери тобою укрепися и прославися, добродетельми же украшен, венец мученика приял еси, поминай нас, чад твоих, и у Господа, преподобномучениче Корнилие.

И ныне

глас 6
Предстательство христиан непостыдное, ходатайство ко Творцу непреложное, не презри грешных молений гласы, но предвари, яко Благая, на помощь нас, верно зовущих Ти, ускори на молитву, и потщися на умоление, предстательствующи присно, Богородице, чтущих Тя.