глас 8
Чистоты ради жития твоего, пощения же и молитв и трудов, сосуд благопотребен был еси Владыце Христу, Иже дарова тя стаду твоему, яко сокровище неотъемлемо, чудесы всех обогащающа. Тем и мы, сошедшеся к раце мощей твоих, верою и любовию вопием: моли о нас, пречестный архиерею, Моисее отче наш.

Слава

глас 3
Яко венцем пресветлым украсився днесь, великий Новград ликует в память пастыря своего и учителя, и, яко диадиму царскую возложивши, честная она обитель светло радуется, прослави бо тя Бог, угодника Своего, и прояви последнему роду нашему цельбоносныя мощи твоя, святителю Моисее, Церковь же Божия веселится, созывающи инок сословие велегласно вопити: радуйся, граду твоему и обители похвало и всея Российския страны пресветлый светильниче.

И ныне

глас 6
Предстательство христиан непостыдное, ходатайство ко Творцу непреложное, не презри грешных молений гласы, но предвари, яко Благая, на помощь нас, верно зовущих Ти, ускори на молитву, и потщися на умоление, предстательствующи присно, Богородице, чтущих Тя.