глас 8
От юности божественною распаляемь ревностию, возлюбил еси чистое жи­тие, презрев мира сего красная и сует­ная, последовал еси твоему Богомудрому учителю, преблаженному Сергию, в труде и бдении, в посте и подвизе: на Сторожи явлься безмолвия ради и стра­жи духовныя недремленным на Боже­ственней стражи предстоянием стяжал еси ум, зряй к Богу, и демонския козни и обстояния прозираяй, озарение Пресвятаго Духа в себе восприем, яко звез­да пресветлая еси верным. Темже и премудр и светозарен предстоятель и пастырь стаду твоему явился еси, све­том твоим просвещаяй и всех, приходящих к тебе верою, отче наш Савво, и мо­ли Христа Бога, да спасет души наша.

Слава

глас 2
Господним желанием распалився страсти плотския воздержанием оттряс, Божественнаго света незаходимое светило явился еси, чудес лучами всех просвещаеши, притекающих к раце мощей твоих, Савво, преподобне отче наш.

И ныне

глас 6
Предстательство христиан непостыдное, ходатайство ко Творцу непреложное, не презри грешных молений гласы, но предвари, яко Благая, на помощь нас, верно зовущих Ти, ускори на молитву, и потщися на умоление, предстательствующи присно, Богородице, чтущих Тя.