глас 4Добродетелей ревнителю, пустынный житель, подвижниче веры Христа Бога нашего, пощением и труды умертвивый плотская вожделения, тезоимените великому Антонию, егоже житию поревновал еси и во егоже имя Божественный храм воздвигл еси. Купно с ним, преподобне Антоние, моли Спасителя всех, да и нас сотворит победители плотских похотей и храмы Духа Святаго, по велицей Его милости.
Слава
глас 6Сверстник и подражатель преподобному Варлааму, послушание к нему истинное стяжав, достоин явился ему преемник, упасши до времене стадо его, добродетелем же его поревновав, в туюжде меру возраста достигл еси, безмолвие пустынное возлюбив, и угоден Господеви показался еси, первоначальник быв пустыни при езере Дымском, тем ти вопием: с преподобным Варлаамом, отче Антоние, моли о нас Бога, да даст нам такожде угодити Ему, якоже и ты, образе послушания и безмолвия тихий рачителю.
И ныне
глас 6Предстательство христиан непостыдное, ходатайство ко Творцу непреложное, не презри грешных молений гласы, но предвари, яко Благая, на помощь нас, верно зовущих Ти, ускори на молитву, и потщися на умоление, предстательствующи присно, Богородице, чтущих Тя.
