глас 2
Богу от юности, отче, избравшу и возлюбившу тя и провидящу твое доб­рое произволение, наставляет тя приити к преподобному Своему угоднику — Кириллу всеблаженному, от негоже наставлен бысть на путь спасения, страхом Божиим, и чистотою душевною, и благоговением, и непрестанными к Бо­гу молитвами во мнозе подвизе жизнь свою препроводил еси и заповеди Божия непорочно соблюл еси, пастырь и наставник иноком предивен был еси, и ныне Престолу Христову со дерзновени­ем предстоиши на Небесех со ангелы светлоликовствуя, отче преподобне, Мартиниане всеблаженне, не престай моляся Христу Богу спасти и помиловати души наша.

Слава

глас 8
От юнаго возраста Божественным желанием разжегся, честному учителю вдан был еси и в воздержании мнозе, отче, пребыл еси, ревнуя благому наказанию, плод многодобродетелен Богу принесл еси, тем молим тя, отче Мартиниане, моли Христа Бога спастися душам нашим.

И ныне

глас 6
Предстательство христиан непостыдное, ходатайство ко Творцу непреложное, не презри грешных молений гласы, но предвари, яко Благая, на помощь нас, верно зовущих Ти, ускори на молитву, и потщися на умоление, предстательствующи присно, Богородице, чтущих Тя.