глас 1
Божественною любовию от юности распалаемь, Павле преподобне, вся, яже в мире красная, возненавидев, Христа единаго возлюбил еси, и сего ради во внутреннюю пустыню вселился еси, со зверьми жити весь Христу. Отонудуже и всевидящее Око, твоя труды видев, даром чудес и по преставлении обогати тя. Темже вопием ти: моли непрестанно о всех нас, честную память твою присно в песнех почитающих.

Слава

глас 8
Все твое умное желание к Богу вперив, и Тому невозвратно от души последовал еси, в пустыню вселився, и тамо ангельски пожив, многим путь был еси ко спасению. Сего ради и Христос тя прослави, и даром чудес обогати. Темже вси вопием ти: радуйся, Павле преподобне, пустынный жителю.

И ныне

глас 6
Предстательство христиан непостыдное, ходатайство ко Творцу непреложное, не презри грешных молений гласы, но предвари, яко Благая, на помощь нас, верно зовущих Ти, ускори на молитву, и потщися на умоление, предстательствующи присно, Богородице, чтущих Тя.