глас 4
Боже отец наших, творяй присно с нами по Твоей кротости, не отстави милость Твою от нас, но молитвами их в мире управи живот наш.

Слава

глас 1
Оком душевным бодрствуя, святителю, бодр пастырь явился еси миру, и жезлом мудрости твоея, и теплым предстательством твоим вся отгнал еси злославныя, яко волки, невредно соблюд стадо, Григорие премудре.

И ныне

глас 6
Предстательство христиан непостыдное, ходатайство ко Творцу непреложное, не презри грешных молений гласы, но предвари, яко Благая, на помощь нас, верно зовущих Ти, ускори на молитву, и потщися на умоление, предстательствующи присно, Богородице, чтущих Тя.