глас 2
Страстотерпцы Господни блаженнии, Православную веру Христову со дерзновением проповедасте и на судищи учения врагов неправая обличисте. Того ради и ввержени бысте, святии, во глубину речную, души же ваши вселишася в Небесныя кровы, идеже со свя­тыми предстояще престолу Царя всех Бога, молитеся Ему за вся православныя люди, подвиги ваша честно почитающия.

Слава

глас 4
Мученик Христовых лик песньми почтим, пострадавших крепко Христовы ради веры истинныя и вражию гордыню до конца низложивших. Озарившеся бо благодатию несозданныя Троицы, славнии, со священномучеником Исидором пострадавшии, яко звезды сияете во всем мире, и ныне молитеся Христу непрестанно, и нас защищаете от враждебных язык нашествия, неусыпнии молитвенницы о душах наших.

И ныне

глас 6
Предстательство христиан непостыдное, ходатайство ко Творцу непреложное, не презри грешных молений гласы, но предвари, яко Благая, на помощь нас, верно зовущих Ти, ускори на молитву, и потщися на умоление, предстательствующи присно, Богородице, чтущих Тя.