глас 4
Написовашеся иногда со старцем Иосифом, яко от семени Давидова, в Вифлееме Мариам, чревоносящи безсеменное Рождение: наста же время рождества, и место ни едино же бе обиталищу, но, якоже красная палата, вертеп Царице показашеся: Христос раждается прежде падший воскресити образ.

Слава

глас 3
Дева днесь Превечное Слово в вертепе грядет родити неизреченно; ликуй, вселенная, услышавши, прослави со ангелы и пастырьми хотящаго явитися Отроча Младо, Превечнаго Бога.

И ныне

глас 6
Предстательство христиан непостыдное, ходатайство ко Творцу непреложное, не презри грешных молений гласы, но предвари, яко Благая, на помощь нас, верно зовущих Ти, ускори на молитву, и потщися на умоление, предстательствующи присно, Богородице, чтущих Тя.