глас 3
Божия Слова Премудрости изряд­ный служитель, Ангельскаго жительства истинный подражатель, Божественныя чистоты рачитель, архиереом сопрестольниче, преподобным сожительниче, пастырская красота, Великому Новуграду похвала, святителю пречестный Феоктисте, отче наш, Емуже, Слову Бо­жию, в житии сем послужил еси, моли спастися душам нашим.

Слава

глас 8
Архиерейское украшение, Великому Новуграду Богодухновенное удобрение, сущая бо в нем люди на пажитех живоноснаго закона Господня упасл еси, и сего ради в лицех святых водворятися сподобися, и святую твою память многими леты сотвори неоскверненну, в нейже тя почитающе, радуйся, от души вопием ти, святителю отче Феоктисте, Великому Новуграду похвала и утверждение.

И ныне

глас 6
Предстательство христиан непостыдное, ходатайство ко Творцу непреложное, не презри грешных молений гласы, но предвари, яко Благая, на помощь нас, верно зовущих Ти, ускори на молитву, и потщися на умоление, предстательствующи присно, Богородице, чтущих Тя.