глас 1
Спаси, Господи, люди Твоя и благослови достояние Твое, победы на сопротивныя даруя, и Твое сохраняя Крестом Твоим жительство.

глас 4
Дивен, творяй преславная чудеса и прославляяй по кончине славящия Тя, нетленная телеса их являя и чудодействии люди обогащая во славу святаго имене Своего, даровавый нам тело угодника Своего Иоанна, молящагося о душах наших.

Слава

глас 8
Приидите, достодолжно почтим Иоанна, новыя благодати служителя новопрославленнаго, славу веры нашея и нашего молитвенника, созывает бо пети благодарными гласы и прославити Прославльшаго святыя Своя и молится о творящих память его и о зовущих ему: радуйся, Иоанне, новое процветение.

И ныне

глас 8
Со святыми упокой, Христе, души раб Твоих, идеже несть болезнь, ни печаль, ни воздыхание, но жизнь безконечная.