глас 4
Верою пламенною апостолу Петру подобяся, радостию страдания за Христа претерпети изволил еси, святителю отче Петре, каменю твердый Церкве Православныя, со исповедники и страстотерпцы русскими во мраце беззаконий добродетельми сияяй, молися с ними о нас, архиерею Божий, священномучениче преславне.

Слава

глас 8
Во святительстве твоем добре подвизался еси, богомудре, и мученичества венцем светло украсился еси, прещения врагов Христовых не устрашився, страданьми твоими отоки Соловецкия освятил еси, сего ради Силы Небесныя удивишася терпению твоему, мы же с верою и любовию притекаем ко святым мощем твоим, досточудне. Ныне со всеми новомученики Церкве Русския моли о нас Христа Бога, всеблаженне Петре, да зовем ти: Радуйся, отче приснопамятне, земли Воронежския в вере утверждение.

И ныне

глас 6
Предстательство христиан непостыдное, ходатайство ко Творцу непреложное, не презри грешных молений гласы, но предвари, яко Благая, на помощь нас, верно зовущих Ти, ускори на молитву, и потщися на умоление, предстательствующи присно, Богородице, чтущих Тя.