глас 4
От юности Церковь себе яко невесту предобручив, за нюже и страдати за Христа возжелел еси и крепостию твоею не изнемогл еси, вседневно душу за паству полагая. Темже последи и смерть от мучителей приял еси, священномучениче Аркадие славне, и теплый о нас пред Богом молитвенниче.

Слава

глас 2
Нравом кроток и сердцем милостив быв, во образ Спасов, священномучениче Аркадие, убогим достояние твое расточил еси, любовию же Христовою обогащен, на Голгофу Русскую возшел еси, темже с новомученики Церкве нашея, престолу Святыя Троицы предстоя, славу Воскресения улучил еси.

И ныне

глас 6
Предстательство христиан непостыдное, ходатайство ко Творцу непреложное, не презри грешных молений гласы, но предвари, яко Благая, на помощь нас, верно зовущих Ти, ускори на молитву, и потщися на умоление, предстательствующи присно, Богородице, чтущих Тя.