глас 1
Спаси, Господи, люди Твоя и благослови достояние Твое, победы на сопротивныя даруя, и Твое сохраняя Крестом Твоим жительство.

глас 4
Исперва житие твое, преподобне, хитростию благоюродства от человек утаено, на небесех пред Ангелы явленно, и аще на земли тмою очес претыкаяся хождаше, но мысленными крилы на вы­соту возшед. Присносущным Светом облистаемь, во отечествии наследова, и земных мнящихся красных храмов не требовав, но в Небесных селех пресветлыя обители стяжал еси, ни ризами мягкими одеялся, но паче власяницу возлю­бил еси, и сего ради паче всех имений земных Небесная сокровища приобрел еси и на земли плотян сый с безплотными совокупляяся, Небесной Царице служа и Той приносимых Ангельских песней насладився, ихже многие люди желая насладитися не могут. Сего ради Всевышний Творец образ Свой и Рождшия Его Богоматери с высоты воздуха на руце твоя, яко на Херувимская носила, дарова тебе. От Негоже Присносущным Светом очи твои уясни, и яко росоточащий облак, молитвами твоими весь мир милованный напои. И ныне в последняя времена святую персть твою, яко Едемский источник, во исцеление недугов устрои, Егоже моли, наставниче наш, чудоносче Иосифе, даровати нам мир и велию милость.

Слава

глас 8
От юности Бога возлюбив и простынею безгласие стяжал еси, преподобне. Сего ради и с Небес сладкий Свет очию получил еси и росоточащии милости пресветлый образ Богоматери с высоты воздуха чрез святых безмездников во объятие приял еси, и Ей богоугодно послужил еси, и обитель составил еси, власяными веригами тело свое удручил еси, от негоже каплями кровными диавола потопил еси. Сего ради и в последняя времена гроб твой от Владыки нашего Христа точением чудес обогатися, тем и мы, чада твоя, любовию притекающе к тебе, умильно глаголем: радуйся, наставниче нашего спасения; радуйся, исцелений подателю; радуйся, отче наш Иосифе, монахов удобрение.

И ныне

глас 8
Со святыми упокой, Христе, души раб Твоих, идеже несть болезнь, ни печаль, ни воздыхание, но жизнь безконечная.