глас 2
Собеседнице преподобнаго Серафима, дивная отроковице и мати наша Марфо, равноангельное житие стяжавши, на Небесех жительства достигла еси, идеже молишися о спасении душ наших.

Слава

глас 8
Кротостию и смирением украсившися и любве Божественныя исполнившися, радость Небесную стяжала еси, отроковице юная и мати наша Марфо, и, в ангельский образ от преподобнаго Серафима облекшися, с мудрыми девами в Чертог Небесный вселилася еси, идеже молишися о спасении душ наших.

И ныне

глас 6
Предстательство христиан непостыдное, ходатайство ко Творцу непреложное, не презри грешных молений гласы, но предвари, яко Благая, на помощь нас, верно зовущих Ти, ускори на молитву, и потщися на умоление, предстательствующи присно, Богородице, чтущих Тя.