глас 4
Торжествует церковь первородных, и свеселится, приемля матерь о чадех веселящуюся, яже яко мудрости тезоименитая, тройственным богословским добродетелем равночисленныя породи. Тыя с мудрыми девами зрит уневестившияся Жениху Богу Слову. С нею и мы духовне в памяти их свеселимся, глаголюще: Троицы поборницы, Веро, Любве и Надеждо, в вере, любви и надежде утверждайте нас.

Слава

глас 1
Софии честныя священнейшия ветви, Вера, и Надежда, и Любовь показавшеся, мудрость обуиша еллинскую благодатию, и пострадавше, и победоносицы явившися, венцем нетленным от всех Владыки Христа увязошася.

И ныне

глас 6
Предстательство христиан непостыдное, ходатайство ко Творцу непреложное, не презри грешных молений гласы, но предвари, яко Благая, на помощь нас, верно зовущих Ти, ускори на молитву, и потщися на умоление, предстательствующи присно, Богородице, чтущих Тя.