глас 4
От юности, богомудре, любовию Христовою просветився, во обитель Александра Свирскаго притекл еси, в послушании, трудех и молитвенных бдениих подвизаяся, чудеснаго видения Царицы Небесныя причастник был еси, по преставлении же учителя твоего в непроходимыя леса Олонецкия удалился еси, идеже многия и великия подвиги подъял еси, клеветы, наветы и изгнания мужески претерпевая, обители Сяндемския основание положил еси и иноков лики ко Христу Спасу привел еси, Егоже моли и нам спастися, чадом твоим, преподобне Афанасие, отче наш.

Слава

глас 8
Приидите, монашествующих собори и постников сословия, сошедшеся, восхвалим блаженнаго Афанасия, сомолитвенника и спостника преподобнаго Александра Свирскаго, с ним бо предстоит Святей Троице и молится спастися душам нашим.

И ныне

глас 6
Предстательство христиан непостыдное, ходатайство ко Творцу непреложное, не презри грешных молений гласы, но предвари, яко Благая, на помощь нас, верно зовущих Ти, ускори на молитву, и потщися на умоление, предстательствующи присно, Богородице, чтущих Тя.