глас 3
Красото Церкве Русския, утверждение старчества Оптинскаго, иноческих заветов блюстителю, оруженосче Господень верный, преподобне отче Варсонофие, мечем молитвы змия победивый, вышния почести о Христе достигл еси, темже молися Тому: Отечеству на враги победу даровати и спасти души наша.

Слава

глас 4
Явился еси старчества благочестиваго столп огненный, любве Евангельския сияние, пророчествуя, назидая и утешая, подая человеком от грехов врачевание, преподобне Варсонофие, отче наш.

И ныне

глас 6
Предстательство христиан непостыдное, ходатайство ко Творцу непреложное, не презри грешных молений гласы, но предвари, яко Благая, на помощь нас, верно зовущих Ти, ускори на молитву, и потщися на умоление, предстательствующи присно, Богородице, чтущих Тя.