глас 1
Славу мира сего презревше, преподобнии, пустынное житие возлюбили есте, души же Богу добре повинувше, постом, бдением и молитвою демоны препобедили есте и, житию ангельскому непорочно поревновавше, на Небесех мзду трудов ваших восприяли есте. Слава давшему вам крепость, слава венчавшему вас, слава действующему вами всем исцеления.

Слава

глас 4
Житейское море подвиги вашими невлажно прошедше, крепкаго пристанища Христова достигли есте, идеже Престолу Пресвятыя Троицы предстояще, Никифоре и Геннадие богомудрии, Владыку всех молите мир вселенней даровати и душам нашим велию милость.

И ныне

глас 6
Предстательство христиан непостыдное, ходатайство ко Творцу непреложное, не презри грешных молений гласы, но предвари, яко Благая, на помощь нас, верно зовущих Ти, ускори на молитву, и потщися на умоление, предстательствующи присно, Богородице, чтущих Тя.