глас 1
Спаси, Господи, люди Твоя и благослови достояние Твое, победы на сопротивныя даруя, и Твое сохраняя Крестом Твоим жительство.

глас 3
Апостоли святии, молите Милостиваго Бога, да прегрешений оставление подаст душам нашим.

Слава

глас 8
Яко священная сокровища Всесвятаго Духа, и Солнца славы сияния по долгу воспоим мудрыя апостолы: Апеллия, Урвана же, и Аристовула, Амплия, Наркисса и Стахия, яже благодать собра Бога нашего.

И ныне

глас 8
Со святыми упокой, Христе, души раб Твоих, идеже несть болезнь, ни печаль, ни воздыхание, но жизнь безконечная.