глас 1
Спаси, Господи, люди Твоя и благослови достояние Твое, победы на сопротивныя даруя, и Твое сохраняя Крестом Твоим жительство.

глас 2
Велия веры исправления, в пещернем затворе, яко на воде упокоения, преподобне отче, радовался еси, огнем бо любве Божественныя распаляемь, бдением и молитвою безстрастия достигл еси и явился еси равноангельный на земли. Того молитвами, Христе Боже, спаси души наша.

Слава

глас 3
Во плоти яко ангел на земли явился еси, и пощением был еси яко древо насажденное, водою воздержания добре возрастився, и теченьми твоих слез скверну омыв; сего ради явился еси приятелище Божественное, Аврамие, Духа.

И ныне

глас 8
Со святыми упокой, Христе, души раб Твоих, идеже несть болезнь, ни печаль, ни воздыхание, но жизнь безконечная.