глас 2
Священный лик небесных человеков в земли Архангельстей во славу Христа Бога явлься, сияет чудесы, свидетельствуя благодать. Того имуще, вернии, возвеселимся: во множестве бо нам показует Богу угодивших, яже украсиша добродетельми страну полунощную, обогатиша Духа Святаго даровании, ныне же предстоят Престолу Вышняго на Небесех и о нас соборне Тому молятся.

Слава

глас 4
В житии земнем Богу угодивше и по отшествии от дольних, в Горних водворившеся, со безплотных лики трисиятельныя славы наслаждаетеся и с воинствы Небесными крилы молитв землю нашу покрываете. Сего ради восхваляет вас, присноблаженнии, святая Церковь и собори верных радуются: вами бо прославися имя Божие в земли Архангельстей.

И ныне

глас 6
Предстательство христиан непостыдное, ходатайство ко Творцу непреложное, не презри грешных молений гласы, но предвари, яко Благая, на помощь нас, верно зовущих Ти, ускори на молитву, и потщися на умоление, предстательствующи присно, Богородице, чтущих Тя.