глас 1
Спаси, Господи, люди Твоя и благослови достояние Твое, победы на сопротивныя даруя, и Твое сохраняя Крестом Твоим жительство.

глас 4
Странен чуждей земли явивыйся, тезоименитый Отцу Высокому, великий Аврааме, купно с честною Саррою, и возлюбивый странноприятие стяжати; тем и Богу в Троице образно собеседницы бывше и приимше на земли зачатие Исаака единаго, в вышних же сподобивыйся чужестранных язык от восток солнца до запад всем верующим во Святую Троицу отец быти, о богоданный отче наш Аврааме, умолите купно с Саррою Святую Троицу о верующих в Ню, да обрящемся в светлостех ваших.

Слава

глас 4
Велию веру показавый к Богу, Аврааме, прежде обрезания, на солнечно место под дуб вселился еси странноприимствовати купно с честною ти Саррою. Темже и трисолнечное величество всея Божественыя Троицы образно зрети сподобилися есте, и богоданное чадо прияли есте. И во странноприимства место во свете немерцающем нам, необрезанным всех стран языком, верующим во Святую Троицу, приимник и верою отец от Бога нареклся еси, Аврааме. Молите купно Святую Троицу о нас, верующих в Ню, да обрящемся в светлостех ваших.

И ныне

глас 8
Со святыми упокой, Христе, души раб Твоих, идеже несть болезнь, ни печаль, ни воздыхание, но жизнь безконечная.