глас 8
Яко образы добродетелей и молитвы плод богодарованный земля Вятская приносит Ти, Господи Боже наш, вся святыя в той пожившия и просиявшия, тех молитвами и предстательством Богородицы соблюди ненаветно отечество наше.

Слава

глас 3
Днесь земля Вятская ликует, прославляющи вся зде Богу угодившия, тии бо ныне предстоят в Церкви и со всеми святыми за ны молятся Вышнему, даровати нам велия милости.

И ныне

глас 6
Предстательство христиан непостыдное, ходатайство ко Творцу непреложное, не презри грешных молений гласы, но предвари, яко Благая, на помощь нас, верно зовущих Ти, ускори на молитву, и потщися на умоление, предстательствующи присно, Богородице, чтущих Тя.