глас 1
Спаси, Господи, люди Твоя и благослови достояние Твое, победы на сопротивныя даруя, и Твое сохраняя Крестом Твоим жительство.

глас 4
Возсия днесь светло, радуется град Белоезеро, имея во области своей великаго светильника, блаженнаго отца Иродиона. Сошедшеся убо людие и празднующе пресветлую память его, осиявающу многими деянии чудес дара. Прося­щим с верою исцеления, страждущим от различных недуг подает здравие. Яко финикс насажден в дому Божия Матере, яко кедр при водах благодатию Хрис­товою растущ. И яко же шипок благовонен обстоянии водами огражден. И мы, чада твоя суще, припадающе, молимтися: моли Пресвятую Троицу, еже сохранитися граду нашему от нахожде­ния иноплеменник и от враг видимых и невидимых. Яко да твоими, отче, ко Гос­поду молитвами спасаемии всегда просим с верою у тебе: моли о нас Христа Бога спастися душам нашим.

Слава

глас 1
Слышавше, отцы и братия, немедленно притецем и немолчно и усердно воспоем ему, глаголюще: о пресветлый наш о Господе учителю, отче Иродионе! Во спасаемых подвигах ревнитель был еси преподобному Корнилию и стопам последовал еси его. И един Единому Богу изволи служити, слезами и постом и бдением изнуряя тело свое вечныя ради жизни. Господеви работая, крест Господень на рамо взем, последовал еси Ему бодренными своими молитвами вооружаяся невидимо на врага. И ныне зрети сподобися во свете неизреченныя радости Пресвятую Троицу. Слава Богу Всельшемуся в тя, слава Укрепльшему тя, слава Деющу тобою всем исцеление.

И ныне

глас 8
Со святыми упокой, Христе, души раб Твоих, идеже несть болезнь, ни печаль, ни воздыхание, но жизнь безконечная.