глас 8
Житие твое, Василие, неложное, и чистота нескверна! Христа ради тело твое изнурил еси постом и бдением, и мразом, и теплотою солнечною, и слотою (ненастьем) и дождевным об­лаком, и просветися лице твое яко солнце: и ныне приходят к тебе российстии народи, цари же и князи, и вси людие, прославляющие святое твое успение. Тем Христа Бога моли, да избавит ны от варварскаго плене­ния и междоусобныя брани, и мир мирови подаст и душам нашим велию милость.

Слава

глас 4
Духом Божиим водим, преблаженне Василие, отрясл еси мирский мятеж и жития треволнения возгнушался еси, и совлекся одеянии тленных, и облекся в ризу безстрастия, убежал еси ловления льстиваго миродержца, и был еси странен во тво­ем языце, и паче земнаго богатства избрав богат­ство небесное, увязлся еси венцем терпения, и ныне, преблаженне Василие, моли Христа Бога о творящих святую память твою, да зовем ти: ра­дуйся, преблаженне Василие.

И ныне

глас 6
Предстательство христиан непостыдное, ходатайство ко Творцу непреложное, не презри грешных молений гласы, но предвари, яко Благая, на помощь нас, верно зовущих Ти, ускори на молитву, и потщися на умоление, предстательствующи присно, Богородице, чтущих Тя.