глас 3
Апостолом совсельник и страстотерпцем первострадалец, Христов служитель, прехвальне Стефане, первее бо совершив мучения течение, безчисленныя роды человек равно Подвигоположнику Христу приведе. Темже, яко апостола и страдальца верховнаго чтуще тя, молим: моли Христа Бога даровати нам велию милость.

Слава

глас 6
Первый сеялся еси на земли Небесным Делателем, всехвальне Стефане, первый на земли за Христа кровь излиял еси, блаженне, первый от Него победы венцем увязлся еси на небесех, страдальцев начало, венечниче мучеников, первострадальне.

И ныне

глас 6
Предстательство христиан непостыдное, ходатайство ко Творцу непреложное, не презри грешных молений гласы, но предвари, яко Благая, на помощь нас, верно зовущих Ти, ускори на молитву, и потщися на умоление, предстательствующи присно, Богородице, чтущих Тя.