глас 8
Яко непорочная невеста Нетленнаго Жениха Христа, праведная дево Иулиание, с светлою свещею добрых дел вошла еси в чертог Его Небесный и тамо со святыми блаженства вечнаго наслаждаешися. Темже моли, Егоже возлюбила еси и Емуже девство твое обручила еси, спасти души наша.

Слава

глас 8
Храм Божий одушевленный, девственною чистотою благоукрашенный, вемы тя, святая праведная дево, княжно Иулиание, темже с любовию празднующе свя­тых твоих мощей обретение, молим тя, известная желаний наших ходатаице: принеси за ны молитвы твоя ко Господу и от всяких бед свобождай нас предстательством твоим у Престола Всевышняго, да зовем ти: радуйся, дево святая Иулиание, невесто Христова прекрасная.

И ныне

глас 6
Предстательство христиан непостыдное, ходатайство ко Творцу непреложное, не презри грешных молений гласы, но предвари, яко Благая, на помощь нас, верно зовущих Ти, ускори на молитву, и потщися на умоление, предстательствующи присно, Богородице, чтущих Тя.