глас 4
Днесь светло празднуем, вернии людие, преславныя Троицкия обители тор­жество: се бо великий собор святых чу­дотворцев Радонежских, яко дивныя птицы небесныя, являет нам Церковь Российская, стезями честнаго их жития шествовати всех призывающи, к нимже, с верою и любовию притекающе, воззо­вем: молитеся о нас ко Пресвятей Трои­це, преподобнии отцы наши с Богоносным аввою Сергием, мир мирови да­ровати и душам нашим велию милость.

Слава

глас 8
Приидите, вси концы отчества нашего, прославим святый лик угодников Радонежских, яко звезды, украсивших небо церковно подвиги земнаго жительства, тех бо предстательством теплым ко Господу многия нам милости Его низпосылаются, бедствия отгоняются и злыя страсти укрощаются. Ихже всесвятую память ныне празднующе, тако возопиим: радуйтеся, Сергие и Никоне и вси Радонежстии чудотворцы, усерднии служителие Живоначальныя Троицы.

И ныне

глас 6
Предстательство христиан непостыдное, ходатайство ко Творцу непреложное, не презри грешных молений гласы, но предвари, яко Благая, на помощь нас, верно зовущих Ти, ускори на молитву, и потщися на умоление, предстательствующи присно, Богородице, чтущих Тя.