глас 1
Спаси, Господи, люди Твоя и благослови достояние Твое, победы на сопротивныя даруя, и Твое сохраняя Крестом Твоим жительство.

глас 8
От царствующаго града и сущая в нем великия обители пресельник явился еси, и промышлением Божественнаго разума наставляем, к морским странам устремися, и тамо в пустыню вселился еси, уклоняяся мирския молвы, силою же Святаго Духа вооружився, крестным оружием вра­ги твоя прогонял еси, постом и непрестан­ною молитвою жизнь твою совершая, ревнуя великим отцем Антонию и Ону­фрию и Павлу Фивейскому, с нимиже Господеви молися, отче Никодиме, спастися душам нашим.

Слава

глас 2
Пустыня, яко царский чертог, усердно возлюбил еси, в нейже жестокое показа житие многолетным пребыванием, очистив свою душу и ум от страстей, и сего ради Святаго Духа предивно приятелище бысть, Никодиме преподобне, Егоже действием и чудесы обогатился еси; темже и мы почитаем подвиги твоя, всеблаженне, но, яко имеяй дерзновение ко Пресвятей Троице, молися непрестанно о всех нас.

И ныне

глас 8
Со святыми упокой, Христе, души раб Твоих, идеже несть болезнь, ни печаль, ни воздыхание, но жизнь безконечная.