глас 1
Спаси, Господи, люди Твоя и благослови достояние Твое, победы на сопротивныя даруя, и Твое сохраняя Крестом Твоим жительство.

глас 4
Мученик Твой, Господи, во страдании своем венец прият нетленный от Тебе, Бога нашего, имеяй бо крепость Твою, мучителей низложи, сокруши и демонов немощныя дерзости. Того молитвами спаси души наша.

Слава

глас 3
Мучителей посрамил еси лукавая коварства и еллинов обличил еси безбожное служение, возсиял еси богоразумие всем человеком, ученьми благочестия, богомудре мучениче; сего ради твою память почитаем любовию, премудре Леонтие.

И ныне

глас 8
Со святыми упокой, Христе, души раб Твоих, идеже несть болезнь, ни печаль, ни воздыхание, но жизнь безконечная.