Перенесение мощей свтт.Московских Киприана, Фотия и Ионы а также Филиппа Первого и Филарета

Перенесение мощей в новый каменный Успенский Собор в Москве в 1472 г.

глас 8
Яко Светлаго Солнца светозарныя звезды, Троическим Светом озаряете сердца верных, пренесением честных мощей ваших, Троицы сосуди явистеся чистии вашим житием, и научисте люди твердо вере Христове, и скверну отгнасте вашими святыми заповедьми, и упасосте добре Христово стадо, по­рученное вам, Богомудре Киприане, со славным Фотием и со Ионою твердым, молитеся Христу Богу, да спасет души наша.

Слава

глас 8
Яко трие велиции светила, явистеся, озаряюще всю подсолнечную Богоданную вам благодатию чудес, и просветисте молитвами своими верных сердца, вашу память чтущих честнаго пренесения. И Владыку Христа всех Творца молите стране нашей на враги победу подати, яко имуще дерзновение, и нам просите велия милости, вопиющих к вам: радуйтеся, поборницы по Христове Церкви и многочестная светила, святителие славнии.

Величание

Величаем вас, святителие велиции Киприане, Фотие, Ионо, Филиппе и Филарете, и чтим святую память вашу, вы бо молите за нас Христа Бога нашего.